2020-ci ildə Bakının bir sıra məktəblərində şagirdlər üçün avtobuslar ayrılacaq və artıq bu istiqamətdə Bakı Nəqliyyat Agentliyi ilə danışıqlara və sıx əməkdaşlığa başlanılıb.
Bizimyol.info xəbər verir ki, bunu Təhsil naziri Ceyhun Bayramov 2019-cu ilin yekunlarına dair mətbuat konfransında deyib.
“2020-ci ilin yeni tədris ilinə qədər Bakının bir sıra ərazilərində şagird sayı çox olan məktəblər üçün avtobus sisteminin təşkili üçün birgə səy göstəririk. Doğrudur, bütün məktəbləri birinci mərhələdə avtobusla təmin olunmayacaq. Lakin layihənin davamı olaraq, iş davam etdiriləcək”.
Nazir həmçinin təhsildə dövlət dəstəyi proqramlarına yeniliklər ediləcəyini, istedadlı tələbələrə xüsusi diqqət yetiriləcəyini vurğulayıb.
O həmçinin məktəblilərin dəsrsdənkənar fəaliyyətinin xüsusi diqqətdə saxlanıldığını, AFFA ilə birlikdə keçirilən futbol çempionatlarını, bu yarışlara 2500-dən çox məktəblinin qatıldığını söyləyib.
Təhsil naziri eyni zamanda təmirə ehtiyacı olan məktəblərin siyahıya alınaraq onların təmiri ilə bağlı işlər görüldüyünü də vurğulayıb.
“Belə məktəblərin hamısını bir gündə tikmək, təmir etmək mümkün deyil, Amma əlimizdən gələni edirik ki, onların sayı sürətlə azalsın”
